【人越大時間過得越快，生活喺香港更快】
點解人越大時間就好似過得越快？
曾經睇過段片係咁解釋：因為年少時期，
所有接觸到嘅人同事都係新鮮嘅，要用更多大腦去記憶，
所以感覺係特別漫長同精彩。
但到人大咗，遇到嘅事情就會開始不停重複。
重複動作係唔再需要記憶，所以相對感覺就會愈來愈快。
嗰陣睇完，震撼之餘亦難免感觸。
因為活喺香港，好似由出世開始，
「重複」呢兩個字已經為自己準備好咁。
讀書時期，「求學是求分數」係鐵一般嘅大道理。
其他乜學會乜活動都係可有可無嘅替代品。
為咗追個學分，重複去溫書補習練習，
就係咁錯過咗好多時間。一眨眼功夫，校園生活就完了。
到畢業完出嚟工作，就係用時間嚟換金錢，
所做嘅嘢不斷重複又重複。即使係自己鍾意嘅工作，
大概都逃唔過呢個命運。一星期五日返工，
可能連難得嘅兩日假期，都逃唔過重覆嘅娛樂方式。
為咗生活（存），為咗有自己嘅一個安樂窩，
可能唔知唔覺，就一直重複到去四五十歲。
可怕？大概已經算好運了。
至少而家二三十歲嘅，都應該有一個不錯嘅童年。
今時今日，「重複」呢個魔掌已經伸延到小學甚至幼稚園，
真係唔敢想像之後會變成點。
記得片段尾段提到：
「人生越精彩的時刻，認識更多的事物，
你遊覽過的地方，你遇見更多的人時候，
時間便過得越慢，感覺更深刻。」
簡單講，嘗試改變，去學、去玩、去追夢，乜都好。
喺香港可能真係唔容易做到，但好多嘢真係事在人為。
要知道我喺寫嘢之前都係過住重複又重複嘅生活。
而家寫嘢，唔係話徹底擺脫咗嗰種生活。
但至少，真係精彩咗唔少嘅。
-----------------------------------------------------------------------------------
原片: https://youtu.be/6LyCC6jjcx8
延伸閱讀:
【人生慶幸得一旅伴，陪我癲住四圍走】
https://www.facebook.com/…/a.144899825641…/652703911528095/…
【開心嘅嘢，自己話事，關人Q事】
https://www.facebook.com/…/a.144899825641…/651383494993470/…
FB: 有心 無默
IG: https://instagram.com/echoofheart/
Search